By ಹುಬ್ಬಳ್ಳಿ: ರೋಟರಿ ಅಂತರರಾಷ್ಟ್ರೀಯ ಜಿಲ್ಲೆ 3170 ರ ವತಿಯಿಂದ ಹುಬ್ಭಳ್ಳಿಯಲ್ಲಿ ಈಚೆಗೆ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಉದ್ಯಮಿ, ಸ್ವರ್ಣಾ ಸಮೂಹ ಸಂಸ್ಥೆಗಳ ವ್ಯವಸ್ಥಾಪಕ ನಿರ್ದೇಶಕ ಡಾ.ವಿ.ಎಸ್.ವಿ. ಪ್ರಸಾದ ಅವರಿಗೆ ರೊಟರಿ ವೃತ್ತಿಪರ ಸೇವಾ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.
ಸಾಮಾಜಿಕ, ಶೈಕ್ಷಣಿಕ ಹಾಗೂ ಕ್ರೀಡಾ ಚಟುವಟಿಕೆಗಳಿಗೆ ಅವರು ನೀಡಿರುವ ಸಹಾಯವನ್ನು ಗುರುತಿಸಿ ಈ ಪ್ರಶಸ್ತಿ ನೀಡಲಾಗಿದೆ. ಡಾ.ವಿ.ಎಸ್.ವಿ. ಪ್ರಸಾದ ಮಾತನಾಡಿ, ಪ್ರತಿಯೊಬ್ಬ ಉದ್ಯಮಿಯು ಅಗತ್ಯವುಳ್ಳವರಿಗೆ, ಹಿಂದುಳಿದವರಿಗೆ ಆರ್ಥಿಕ ನೆರವು ಕಲ್ಪಿಸಬೇಕು. ರೋಟರಿಯಂಥ ಸಂಸ್ಥೆಯು ಈ ರೀತಿಯ ಕಾರ್ಯಕ್ರಮಗಳ ಮೂಲಕ ಸಮಾಜಕ್ಕೆ ಒಳ್ಳೆಯದನ್ನು ಮಾಡಲು ಪ್ರತಿ ವ್ಯಕ್ತಿ ಹಾಗೂ ಸಂಸ್ಥೆಯನ್ನು ಪ್ರೇರೇಪಿಸುತ್ತದೆ. ಬಡವರಿಗೆ ನೆರವಾಗುವ ನಮ್ಮ ಸೇವಾ ಕಾರ್ಯವನ್ನು ಭವಿಷ್ಯದ ದಿನಗಳಲ್ಲೂ ಮುಂದುವರಿಸುತ್ತೇವೆ ಎಂದು ಹೇಳಿದರು.
ರೊಟರಿ ನಿಕಟಪೂರ್ವ ಡಿಸ್ಟ್ರಿಕ್ಟ್ ಗವರ್ನರ್ ವೆಂಕಟೇಶ ಬಬನ್, ಡಿಸ್ಟ್ರಿಕ್ಟ್ ಗವರ್ನರ್ ನಾಸಿರ್ ಬಿ., ವಿಜಯ ಹಟ್ಟಿಹೊಳಿ, ದೀಪಕ ಪಾಟೀಲ, ಗಿರೀಶ ಪಾಟೀಲ, ಅಶೋಕ ಮಹಾಜನ, ರವಿ ಧೋತ್ರೆ, ರವಿಕುಮಾ ಅಯ್ಯರ್ ಇನ್ನಿತರರಿದ್ದರು.
