ಸಿಂಗಾಪುರದ ಪ್ರತಿಷ್ಠಿತ ‘ಇಇಇ ಎಕ್ಸಲೆನ್ಸ್’ ಪ್ರಶಸ್ತಿ ಗೆದ್ದು ಇತಿಹಾಸ ಬರೆದ ನಿಲುಫರ್ ತಮಾಟಗಾರ್!

ವಿದೇಶಿ ನೆಲದಲ್ಲಿ ಕನ್ನಡದ ಪತಾಕೆ: ಹೆತ್ತವರಿಗೆ ಹಾಗೂ ನಾಡಿಗೆ ಕೀರ್ತಿ ತಂದ ಮಗಳು: ಧಾರವಾಡದಿಂದ ಸಿಂಗಾಪುರದವರೆಗೆ ಶೈಕ್ಷಣಿಕ ದಿಗ್ವಿಜಯ

ಹುಬ್ಬಳ್ಳಿ: ಜಾಗತಿಕ ಮಟ್ಟದ ಪ್ರತಿಷ್ಠಿತ ಶೈಕ್ಷಣಿಕ ಸಂಸ್ಥೆಯಾದ ಸಿಂಗಾಪುರದ ನ್ಯಾನ್ಯಾಂಗ್ ತಾಂತ್ರಿಕ ವಿಶ್ವವಿದ್ಯಾಲಯದಲ್ಲಿ (NTU) ಸ್ನಾತಕೋತ್ತರ (MSc) ವ್ಯಾಸಂಗ ಮಾಡುತ್ತಿರುವ ನಗರದ ಹೆಮ್ಮೆಯ ಪ್ರತಿಭೆ ಕುಮಾರಿ ನಿಲುಫರ್ ತಮಾಟಗಾರ್ ಅವರು 2026ರ ಸಾಲಿನ ಪ್ರತಿಷ್ಠಿತ ‘ಇಇಇ ಎಕ್ಸಲೆನ್ಸ್ ಪ್ರಶಸ್ತಿ’ಗೆ (EEE Excellence Award) ಭಾಜನರಾಗಿದ್ದಾರೆ.

ವಿಶೇಷವೆಂದರೆ, ನಿಲುಫರ್ ಅವರು ಸಾಧನೆ ಮಾಡಿರುವ ಈ NTU ವಿಶ್ವವಿದ್ಯಾಲಯದ ಎಲೆಕ್ಟ್ರಿಕಲ್ ಅಂಡ್ ಎಲೆಕ್ಟ್ರಾನಿಕ್ ಇಂಜಿನಿಯರಿಂಗ್ (EEE) ವಿಭಾಗವು QS ಜಾಗತಿಕ ಶ್ರೇಯಾಂಕದಲ್ಲಿ ವಿಶ್ವಕ್ಕೆ 4ನೇ ಸ್ಥಾನ ಹಾಗೂ ಏಷ್ಯಾ ಖಂಡದಲ್ಲೇ 2ನೇ ಸ್ಥಾನ ಹೊಂದಿದೆ. ಅಷ್ಟೇ ಅಲ್ಲದೆ, ಪ್ರತಿಷ್ಠಿತ ‘ಯು.ಎಸ್. ನ್ಯೂಸ್’ (US News) ಜಾಗತಿಕ ರ‍್ಯಾಂಕಿಂಗ್‌ನಲ್ಲಿ ಈ ವಿಭಾಗವು ವಿಶ್ವದಲ್ಲೇ ನಂ. 1 ಸ್ಥಾನ ಪಡೆದಿದೆ. ಇಂತಹ ಜಾಗತಿಕ ಅಗ್ರಮಾನ್ಯ ಸಂಸ್ಥೆಯಲ್ಲಿ ತಮ್ಮ ಶೈಕ್ಷಣಿಕ ಅವಧಿಯ ಅತ್ಯುತ್ತಮ ಸಾಧನೆಗಾಗಿ ನಿಲುಫರ್ ಈ ಗೌರವಕ್ಕೆ ಪಾತ್ರರಾಗಿದ್ದಾರೆ.

ಜುಲೈ 23, 2026 ರಂದು ನಡೆಯಲಿರುವ ವಿಶ್ವವಿದ್ಯಾಲಯದ ಭವ್ಯ ಘಟಿಕೋತ್ಸವ ಸಮಾರಂಭದಲ್ಲಿ ನಿಲುಫರ್ ಅವರಿಗೆ ಅಧಿಕೃತವಾಗಿ ಪ್ರಶಸ್ತಿ ಪತ್ರ ಹಾಗೂ $500 ಸಿಂಗಾಪುರ್ ಡಾಲರ್ ನಗದು ಬಹುಮಾನವನ್ನು ನೀಡಿ ಗೌರವಿಸಲಾಗುವುದು ಎಂದು ವಿಶ್ವವಿದ್ಯಾಲಯದ ಪ್ರಕಟಣೆ ತಿಳಿಸಿದೆ.

ಪ್ರತಿಭೆಯ ಶೈಕ್ಷಣಿಕ ಹಾದಿ: ನಿಲುಫರ್ ಅವರು 1 ನೇ ತರಗತಿಯಿಂದ 7 ರ ವರೆಗೆ ಧಾರವಾಡದ ಸೇಂಟ್ ಜೋಷೇಫ್, 8 ರಿಂದ ಪಿಯುಸಿ ವರೆಗೆ ಪಂಚಗಣಿ ನ್ಯೂ ಎರಾ ಹಾಗೂ ಮಣಿಪಾಲ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಬಿ.ಇ ಪದವಿ ಮುಗಿಸಿ, ಬಳಿಕ ಸಿಂಗಾಪುರದ NTU ಸಂಸ್ಥೆಯಲ್ಲಿ ಸ್ನಾತಕೋತ್ತರ ವ್ಯಾಸಂಗ ಮಾಡಿದ್ದಾರೆ.

ಅಂತರರಾಷ್ಟ್ರೀಯ ಮಟ್ಟದಲ್ಲಿ ಧಾರವಾಡದ ಕೀರ್ತಿ ಪತಾಕೆ ಹಾರಿಸಿದ ಮಗಳ ಅಪೂರ್ವ ಸಾಧನೆಗೆ ತಂದೆ ಇಸ್ಮಾಯಿಲ್ ತಮಾಟಗಾರ್  ಅವರು ಅತ್ಯಂತ ಸಂತಸ ವ್ಯಕ್ತಪಡಿಸಿದ್ದಾರೆ. “ಒಬ್ಬ ತಂದೆಯಾಗಿ ನನಗೆ ಇಂದು ಹೆಮ್ಮೆಯ ಕ್ಷಣ. ನಿಲುಫರ್ಳ ನಿರಂತರ ಪರಿಶ್ರಮ ಮತ್ತು ಶೈಕ್ಷಣಿಕ ಶ್ರದ್ಧೆಗೆ ಸಂದ ಸೂಕ್ತ ಗೌರವ ಇದಾಗಿದೆ” ಎಂದು ಅವರು ಹಾರೈಸಿದ್ದಾರೆ. ವಿಶ್ವದ ನಂ. 1 ಶ್ರೇಯಾಂಕಿತ ವಿಭಾಗದಲ್ಲಿ ಭಾರತದ, ಅದರಲ್ಲೂ ಧಾರವಾಡ ಮೂಲದ ವಿದ್ಯಾರ್ಥಿನಿಯೊಬ್ಬರು ಈ ಅತ್ಯುನ್ನತ ಪ್ರಶಸ್ತಿಗೆ ಪಾತ್ರರಾಗಿರುವುದು ಇಡೀ ದೇಶಕ್ಕೆ ಹಾಗೂ ಕರುನಾಡಿಗೆ ಹೆಮ್ಮೆಯ ಸಂಗತಿಯಾಗಿದೆ.